Ma xe posibie che i 3Veneti ga da esar sempre e soeo considerai ignoranti, rasisti e imbriagoni?
I Veneti, o Gens Venete, come ne ciamava Tito Livio xà nel 59 a,C, xe un dei popoli pì antighi d’Europa e se femo ancora considerare dei “pori mona”, boni soeo a taxere e pagar tasse. A asociasion Cea Venetia no ghe sta!
OBIETIVI
El nostro obietivo xe far conosere a nostra Storia, a nostra Arte e a nostra Cultura milenaria sia a quei che sta in Italia che ai discendenti de i 5 MILIONI de Veneti che da el 1866 a el 1976 ga dovuo emigrar a l’estero.
Na roba ga da esar ciara:
No se poe esar ogogliosi de queo che no se ama.
No se poe amar queo che no se conose.
E no se poe conosere queo che i ne ga tegnuo sconto fin deso.
Xe ora de saver chi che semo e da dove vegnemo.
STRATEGIA
Semo un grupo de xente preparà su vari temi (storici, leterari, musicai, artistici), che ga voia de fare e che promovarà a nostra Cultura atraverso tute e forme posibii e en special modo nel multimedia (podcast, socials e video). Sempre traduzendo e sototitoando de volta en volta a nostra Lengua en italiano, inglese, portoghese e spagnoeo.
GHEMO BISOGNO DE NA MAN? SI!
Iscriverse all’asociasion Cea Venetia xe l’aiuto pì grande che podì far. Ne darà forsa morae! Che aa fine xe queo che pì conta.
Co l’iscrision en regao suito el libro Veneto e Veneti che ve conta en pilole a Storia, a Cultura e e curiosità su a nostra bea xente. Iscrision e libro vien en totae 15 Euri. Xe posibie vedare el contenuto gratis del libro on line clicando qua.
Ne piaxaria che insieme a quei quatro schei rivase anca tante idee, sugerimenti, projeti. Parchè xe vero che purtropo sensa schei no se fa gnente … ma i schei no xe tuto. Ansi xe poca roba se no ghemo queo che veramente conta: a voia de saver chi semo e da dove vegnemo.
I Veneti xe xente che se tira su e maneghe, inventa e fa.
Quindi poche teghe … demoghe dentro!
Un strucon a tuti!
